容祖兒和李克勤將於9月合體攻紅館開騷，昨日克兒乘坐由王敏德駕駛的直升機飛越維港和紅館上空，再降落尖沙嘴半島酒店舉行記者會，氣勢十足。早前兩人為個唱名字傷盡腦筋，曾公開徵求演唱會名，收到逾3,000個提議，祖兒說：「最後都係實實在在叫『容祖兒李克勤演唱會』。」克勤笑說：「頭先喺上空見到售票處有唔少南亞裔人排隊，不如起個名叫『南亞大戰姨媽姑姐爭飛演唱會』。」
記者會上播出兩人多年來的演藝短片，包括初出道的娘爆造型，克勤說：「冇以前點會有𠵱家咁四正。」祖兒就自嘲：「03年我好似西環浸咗好耐，浮起脹晒發水麵包咁，不過𠵱家乾晒水，係收晒水。」之後克勤推出蛋糕，預祝祖兒今天35歲生日快樂，當祖兒許願時，身旁英皇高層吳雨說：「祝福師兄師姐好。」由於祖兒男友劉浩龍花名叫師兄，祖兒即藐嘴望向吳雨。
訂過千張飛贈親友
演唱會暫定9月11至18日共8場，克勤表示若反應好會加場，祖兒指克勤是有家室之人，對於場數門票睇法較穩陣，但自己一直覺得會掂，至於飛債方面，克勤說：「噚晚食餐飯就冇咗100張飛，其實我之前已經訂咗成千張飛，以備身邊親友。」祖兒就說：「我嘅態度係來者不拒，不過助手就話我唔好再咁。」
提到師兄「污糟手論」被公司暫停工作計劃，克勤幫祖兒擋駕：「今日唔講演唱會以外嘅事。」祖兒則避答說：「老闆話如果答其他就要罰錢。」
採訪：馬建華
攝影：陳俊強
