歐洲主要聯賽收「咧」，呢輪就主打國際賽，繼上周六有阿根廷贏唔到、希臘法國輸埋波呢啲冷門戰果，周日亦都唔多正氣，好似美洲國家盃，巴西靠尼馬一個入球一個助攻，先驚險補時階段反勝秘魯2:1，僅僅開出1.26倍主W，買咗「讓球主客和」「主勝」球迷就真係慘情；而另一支勁旅哥倫比亞更加輸埋，呢陣冷風真係凍親唔少球迷。
尼馬做救世主贏2:1
今屆美洲盃除咗揭幕戰智利贏厄瓜多爾2:0，之後都有唔少冷門戰果，周日輪到八屆冠軍巴西登場，面對秘魯諗住實食冇黐牙，點知秘魯翼鋒基斯甸古華三分鐘已經把握森巴兵團後衞大衛雷斯，同門將謝法臣奧利華拉因誤會派膠，近門射入先開紀錄。好彩尼馬唔單止喺巴塞隆拿做開救世主，喺國家隊一樣咁勁，兩分鐘後頭槌追成平手，到補時兩分鐘，仲助攻畀杜格拉斯哥斯達右路窄位建功，險勝2:1，總算打開C組勝利之門。
「有尼馬包搞掂」，呢句話說真係冇誇張，原來計埋今場，尼馬最近24場國際賽，巴西獲得22勝2和，如果上年世界盃尼馬唔係八強俾哥倫比亞守將辛尼加踢傷，準決賽會唔會俾德國大炒真係未知數。講入球，尼馬用咗64場波累積44個入球，雖然論入球率，尼馬都仲差過比利、薛高同羅馬里奧，不過同「大哨」朗拿度睇齊，真係新一代巴西入球機器。可惜巴西呢場僅僅熟，只開出1.26倍主W，亞洲盤巴西讓球半當然下盤，「讓球主客和」「主勝」亦都開唔出，上盤客真係慘。
哥倫比亞樣衰負委國
講開爆冷，美洲盃頭一輪分組賽真係幾多爆冷，周日C組另一場波，哥倫比亞就0:1爆冷輸畀委內瑞拉，爆出7.5倍客W，哥國前鋒法卡奧盛傳美洲盃完成後就轉投車路士，不過以佢今場低迷表現，我求大俠如果係摩連奴，就真係想推翻個交易嘞。話時話，周三巴西就對哥倫比亞，球迷真係要度真啲啦！
另外，歐國盃外圍賽周日都有唔少強隊僅熟場面，西班牙作客白俄羅斯，只靠大衛施華上半場完結前建功，以1:0小勝，繼續排C組次名。英格蘭作客斯洛文尼亞亦係僅贏一球，但過程驚險好多，斯國先開紀錄，亦都一度追成2:2平手，好彩英軍中場韋舒亞取得國際賽首個入球，就已經打孖上，加上朗尼奠勝，以3:2險勝，E組六戰全勝，出線就好穩陣。
識睇，一定係睇足英台【英波Live】：
http://soccer.appledaily.com
http://bit.ly/engballlive