撇開政見不談，Mary一向認為，除了曾鈺成、政府問責團隊中某幾位高官，建制派中人搞親宣傳都甩甩漏漏，尤其大規模動員起來之時，乜嘢騎呢異物都會洶湧而至，過猶不及、好做唔做，十次有九次幫倒忙，有時都戥現屆政府辛苦。
唔係凈係我講，高官私下交流都係咁話，彼此慨嘆，有時真係收聲當幫忙。
相反泛民以至比較激進人士的宣傳一向較貼地，運用成本近乎零的新媒體又到家，每以underdog之身，破格出擊，反而時有佳作。
不過這幾天政改表決迫在眉睫之際，支持一方的攻勢又稍見起色，起碼「團結基金」那個用1978年電視劇《奮鬥》主題曲製作的廣告，就拍得很不錯，每次音樂響起，都叫Mary抬頭失神凝望畫面，一看，就不禁懷念昔時的好，大概這廣告總能喚起一群五、六十，以至七十後的情意，再想一想，或者先團結，往前走也未嘗不好。
不過不過，最勁的公關策略都不及對頭人失手咁有效果。大嚿長毛今次忽然好似愛字頭上身，好做唔做，一時三億一時又一億，亂講當秘笈，未幾不知是否自知闖了禍，長毛又出來連環解畫，又認一億乃純創作，決戰前夕，竟然自導自演負面新聞，嚴重影響泛民公信力，你都咪話唔傷。有人話，如果三大學滾動民調這幾天數字錄得反對方倒退，這對孖寶「應記一功」。
當然，話說回來，做為公關，你又得佩服長毛的傳媒觸覺囉──我話夠我食兩世，無記者有興趣㗎，講一億，即刻有人寫！嗱，呢啲咪係傳說中的sound bite囉，公關行家為求一句，諗到一夜白頭呀！
彭瑪莉
mailto:[email protected]