聯想控股（3396）董事長柳傳志今年71歲，自2011年退任子公司聯想（992）主席一職後，好少在港公開露面，聯想控股今日招股，佢終於親自掛帥。
雖然佢已經一頭花髮，但說話依然中氣十足，仲一改以往霸氣外露嘅形象，就算幾次被問到幾時退休，都笑笑口答，盡顯慈祥。
講番佢退休，佢早年曾經講過，聯想控股上市之後就會退休，不過近月開始改口風，一時話上市後兩年會退任，一時就話等聯想運作平穩，先至退落嚟。
噚日佢俾人當面問到幾時退休，佢就話，就算聯想控股上市與否，都可以退下來，但目前想享受上市之後嘅成果。佢話，目前最關注係公司嘅管理班子係「如何幹活」，當佢哋越來越成熟，佢亦會順其自然考慮退休。講嚟講去，其實柳生仲未想退休喎。