立法會行管會噚日提出咗一系列政改表決期間嘅特別措施，防範有人再衝入立法會，其中一項建議卻令議員及議員助理冇啖好食，就係閂咗立法會canteen同5樓嘅coffee corner，成班人喺大樓內肚餓了但又唔走得開，點醫肚至好？
秘書處早有準備，噚日開始派發表決日嘅午餐同晚餐飯盒訂購表，填咗就喺門口領餐。唔通秘書處覺得大家午餐好胃口過晚餐，所以午餐選擇多啲，包括紅燒蘿蔔豬軟骨飯、薯仔咖喱雞飯及豉汁排骨涼瓜飯等6款任君選擇；晚餐卻只有冬瓜枝竹火腩飯同薯仔咖喱雞飯咋。
有議助苦笑話，屆時議助只限喺自己樓層活動，5樓會議室又停用，出入有限制，加上餐廳閂晒，食飯要領餐，似足坐監，諷刺張餐單欠咗個橙。立法會主席曾鈺成噚日就叫記者唔使擔心冇嘢食，因為記者都可以填表訂餐。