港足今晚在旺角場鬥馬爾代夫，門票已經全部售罄，買了門票的朋友如何可以入場盡興，今次這個「旺角場攻略」可以幫到你；而未能購票但仍想一齊參與「撐自己人」活動的球迷，我們亦會為大家介紹秘位，免費現場睇港足。
神秘區 偷睇球賽
雖然賽事門票已經售罄，但又想現場感受氣氛，亦不是沒可能；在旺角場界限街入口及雀仔街其實有幾個「偷睇位」，其中界限街入口處有幾條門罅，可以看到部份球場。若然到時人多連秘位都爆滿，當晚運動場道花園街附近的酒吧會亦有電視直播，球迷可以考慮在幾百米外幫港足打氣。
打氣區 最緊要紅
想同大家一齊「撐自己友」，記得着代表港隊主場出擊嘅紅衫，一齊發揮紅海威力；除了衣着，亦要記住以下主要口號「We are Hong Kong」、「Ready go」、「獅子山下」、「We love Hong Kong」、「畀牌啦」等。另外，由於港隊有安基斯、高梵、法圖斯及基藍馬幾位黑人球員，為免認錯，記得入場前攞份免費場刊。港隊會大約在賽前一小時開始熱身，球迷記得早點入場助威。
着數區 免費啤酒
上次港隊主場對不丹，啤酒贊助商提供900罐啤酒給18歲以上持票尾的球迷換領，反應非常熱烈，開賽前一個多小時已經換完。今次贊助商決定加碼至2,000罐，大家早點入場應該可換到啤酒解解渴。值得一提，球場不可以帶水樽，只可帶紙包飲品，如有水樽，入場前會有工作人員提供膠杯，讓球迷將飲料倒入膠杯內進場。此外，場內只有一個小食部，半場多數會排長龍。
醫肚區 等食點心
旺角場附近，如運動場道及花園街有不少食店，各適其適，最受歡迎是任何時間都要排隊，在運動場道的「一點心」；另外，一街之隔的花園街有多間麵店、茶餐廳及越南餐廳等，睇完波亦可幫襯附近的糖水及甜品店。
記者：曾雁平
識睇，一定係睇足英台【英波Live】：
http://soccer.appledaily.com
http://bit.ly/engballlive