磚頭有價，「殼王」陳國強太太伍婉蘭（Macy）向來有投資物業，聽聞佢近排趁個市旺，以1,850萬元沽咗一個何文田山道1號單位。
呢個物業旺中帶靜，喺正傳統豪宅區，陳太喺2003年中以公司名義買入，當時個單位650萬元，實用面積1,006呎。佢持貨12年，今次沽貨，價錢造得好，呎價成1.8萬元，陳太賬面賺1,200萬元。
聽講Macy近年間唔中都會沽吓貨，好似兩年前，有買家出價7,000萬元要佢件中半山帝景園，佢都趁機沽貨大賺一筆。而最近唔少藝人都好熱衷入市，好似藝人蔡少芬，就以2,600幾萬元買入元朗新樓爾巒獨立屋，豪氣逼人。劉愷威夫婦都勁，超過半億買入西半山寶城大廈老牌豪宅。