這天沙田賽事大利三歲馬，話口未完三歲馬又贏一場，此乃第七場三班1400米，初跑此程之「辣得很」。呢匹文廐生力軍增程首配潘頓一擊即中，爆8.5倍半冷WIN開齋，潘頓連同第六場幫同齡馬葉廐「琪麟穎」大熱出頭在內，個人憑一對三歲馬捧走第六口孖寶。賽後「辣得很」馬主黃紋與丈夫吳創木、其靚靚新抱及孫兒等三代同堂拉頭馬，非常開心。
今場兩大高手潘頓同雷神，分別騎「辣得很」同「華恩庭」都排大外檔起步，「辣得很」跑落生猛好多，沿途有前有後，拉士仲可以加速拋離對手，反觀1.8倍「華恩庭」輸開有條路，上仗排內檔都唔夠「總統至上」跑要做二奶，呢勻抽大外檔孭133頂磅，全程外叠望空蝕住走，直路衝落係咁多，臨尾仲畀啡燈馬「縱橫大地」追過埋只得第三，「縱橫大地」首次入Ｑ，第四名則由全場最老之八歲馬「齊歡笑」攞到。三T正獎冇人中，安慰獎中頭關已經派41萬幾。