本地三級賽太子珠寶鐘錶精英盃於2011年創辦，近三屆大熱門冇W有Q，今屆卻一反常態，由全場最冷四駒包辦接近15萬元四重彩。
第八場1400米三級賽，當中一對全場最冷馬，同為20倍之摩廐「風花雪月」及蔡廐「驌龍」一放一追，串成96倍Q。「風花雪月」成功捧盃，今季贏兩次都係由羅理雅爆冷，一次22倍，一次20倍，呢勻更係在港首勝分級賽，可惜除了大摩外，馬主包大偉亦不在場，由老友張顯信及一位長髮氣質美女代為捧盃。大摩身在英國照樣大搏殺，跑完呢場已經憑「人民武士」、「勇士勁」及「風花雪月」中三元，一下子彈甩番排第二之方嘉柏五WIN，奪冠形勢大好。
摩廐今場出五駒，居然以最冷三駒表現最好，「風花雪月」、「同個夢想」及「駿馬名駒」分獲冠、季、殿軍，反為大熱門「新力風」冇段好睇，雷神直落輸足八場，僅得三P冇馬贏過。
「同個夢想」着啡燈落重飛，可惜追唔切只得第三，落飛黨重創，今場摩廐三重彩畀「驌龍」篤爆，後駒由柏寶後追第二，「驌龍」馬主劉業強差少少運，唔能夠贏大賽賀自己接替父親劉皇發出任新界鄉議局新主席。