為慶祝《蘋果日報》創刊20周年，連續一星期的《我Q你答問會》今日來到尾聲，壓軸出場的作客嘉賓李嘉欣（Michele），不但有「最美麗港姐」之稱，更加是賢妻良母。由於嘉欣一向予人這麼近、那麼遠的感覺，很多人都對她的家庭生活、飲食習慣好有興趣。為滿足大家好奇心，日前本報在銅鑼灣尋找了12位讀者向嘉欣提問，更發現原來一代美女絕不離地，都鍾意平民化食茶記！
採訪：小米、魏嘉琳
1. Hailey：你鍾唔鍾意去茶餐廳㗎？你鍾意食啲乜嘢㗎？
嘉欣：我都鍾意去茶餐廳嘅！最鍾意食豬扒撈丁、奶醬多同凍奶茶。
2. June：你咁fit，你一日食幾多餐㗎？
嘉欣：其實我一日食兩餐，但其餘會再食啲零食之類嘅食物。
3. Kobe：我想問如果你有順風耳，你最想聽到你老公講乜 ?
嘉欣：最想聽佢講：「你係一個滿分嘅太太！」
4. 劉小姐：嘉欣你咁靚，你想唔想生個女好似你咁靚呀？
嘉欣：想呀！我想生女，如果好靚就更加好，如果唔靚就真係唔知點算好，所以到𠵱家都未生囉！
5. 羅先生：喺街見到你，可唔可以同你合照呀？
嘉欣：視乎個狀態啦！如果嗰日化晒妝都可以問吓嘅！如果都差唔多認唔到我係邊個，就最好唔好行埋嚟喇！
6. Kenny：你老公最鍾意你邊一道撚手小菜呀？
嘉欣：係日式餃子，我老公成日都話我一出呢樣嘢，就一定冇乜好嘢或者有嘢想講，覺得自己整得好味過喺日本嗰度食！
7. ChingYu：Michele你仲會唔會拍戲？想做乜嘢角色呀？
嘉欣：如果有一日我仲會拍戲嘅話，可能會試微電影或者舞台劇，試一啲未試過嘅！
8. Sharifer：你覺得自己邊部份唔夠完美呀？
嘉欣：性格如果可以再婉轉啲，唔好咁直接，可能會更加好啦！
9. Cherry：我想問你有幾多對鞋？我想參觀你個衣帽間呀！
嘉欣：鞋就冇數過，但衣帽間已經變咗小圖書館咁，好多雜物，如果有人去我屋企都會兜開行，唔好俾人見到，因為真係好亂。
10. Hin：李嘉欣，你有冇諗過剪短頭髮呀？
嘉欣：其實有，但因為身邊不斷有啲人就算我剪咗1cm都會話「好短呀！好短呀！幾時先留得番長呀？」咁耐都受人影響，所以冇剪短過頭髮，但會繼續諗。
11. 李先生：你將來對你的新抱有甚麼要求？
嘉欣：要係一個注重家庭的女士，可以有自己嘅事業，但一定要聽晒我個仔講啦，哈哈！
12. 陳小姐：可以分享一下教兒子的秘方嗎？
嘉欣：有時嚴得滯又驚太嚴，鬆得滯又驚好鬆，所以自己都喺度拿捏緊，要配合埋佢性格，所以都冇乜秘方。
