問恒隆地產（101）董事總經理陳南祿（Philip）平常最愛幫襯邊間餐廳，佢二話不說、掛起招牌笑容介紹3個好地方，包括馬會、美心，仲有恒隆旗下商場食肆，事關佢係馬會董事、太太係美心太子女伍淑恩，最後一個建議就不用解釋了吧。
但其實佢平時好鍾意去灣仔新景園，喺外國讀緊大學嘅女兒每次帶朋友回港放假，Philip必定帶佢哋去新景園食咖喱豬扒飯（72元）。
呢碟咖喱豬扒飯一上桌就有一種震撼嘅感覺，兩塊面積夾埋大過隻碟嘅豬扒，咬落外脆內軟；食晏繁忙時段，侍應哥哥雙手捧住3、4碟咖喱豬扒飯不停喺細小嘅店內遊走上桌，充滿肉感。
嗜辣嘅Philip一臉饞嘴咁話，「咖喱汁與豬扒另上真係正，最好炒多碟菜！」佢帶過唔少名人朋友去幫襯，興之所致又會同太太兩個人一齊去撐枱腳，不過佢話呢度最麻煩係泊車，好難搵車位。都說一講到食，你我他都一樣，可以好街坊。
想深一層，Philip帶外國朋友去新景園幾有諗頭，呢度夠地道有特色，又唔似魚蛋河、叉燒飯咁普通，果然有計！
記者：高淑嫻