普遍泛民都話，相信否決大局已定，冇乜奇蹟，有泛民卻笑傳媒捉錯用神，話與其搵邊個會轉軚撐政改，不如估吓建制派會少幾多張票仲有新意。
提防怪醫田少
呢位泛民講緊嘅係醫學界議員梁家騮。佢話怪醫至今都係好肯定咁講，呢個政改方案袋唔落，明顯冇諗住賣賬畀阿爺，「表決日怪醫先係焦點」。有泛民話呀，據佢哋所知，其實政府內部評估過，都覺得怪醫呢票應該冇咗，所以如果要通過，必須喺泛民陣營攞多張票補番，「但政府一張泛民票都袋唔到，更何況想要多張？」
另有泛民中人話，其實唔只要留意怪醫投票取向，連自由黨都要贒實，事關佢哋話走中堅中立路線嘛，而且𠵱家民意大逆轉，係咪應該按民意投票先？佢哋尤其留意田少嘅取向，事關田少決定自掏腰包搞政改民調，無非係想用民意誘泛民轉軚，而若然佢個民調最終都係反對嘅多過支持，係咪應按民意投反對先？
花生友向自由黨中人了解過，雖然佢哋成日同政府唱反調，但面對政改呢個「硬任務」，都話唔會同中央過唔去嘅，因此一如03年咁突然轉軚唔支持嘅機會幾乎冇乜可能，以免得罪阿爺冇運行，但田少向來好自由，而且啲柴都被阿爺搣走晒，冇嘢可再被阿爺威脅，唯一變數係田少會爆冷嚟個「破格之舉」箒，但都係嗰句，總之田少唔代表自由黨立場，以免阿爺嬲嬲豬。
花生友