公共圖書館每星期六或日均推出「兒童故事時間」，每節一小時，適合4至11歲兒童參加。做咗13年兒童故事導師嘅張綺嫺，每星期喺屏山天水圍公共圖書館為小朋友講故事，《愛麗絲夢遊仙境》同《灰姑娘》等經典都係佢嘅至愛。
張綺嫺接受政府新聞網訪問時話，做故事導師要有赤子之心，亦要有講故事嘅技巧，有時都會遇到哭笑不得嘅情況，「小孩子耐性有限，曾有小朋友在聽故事中途不見了，原來偷偷躲到桌子下」。
曾經從事課餘託管幼兒工作張綺嫺，其實係全職家庭主婦嚟㗎，2002年起自薦出任故事導師至今，除咗講故事，佢都會教小朋友做手工同繪畫。其實公共圖書館會不定時招募故事導師，具備教學或主持兒童活動嘅經驗都可以申請，試吓做個說故事的人。