待嫁新娘白雲，搵到個學識高兼有家底嘅男友江俊霖（Kelvin），佢哋將於明年10月喺尖沙嘴洲際酒店擺酒。白雲雖未正式成為人妻，但已生活無憂，前日約埋三位閨密去澳門喪玩兩日一夜，噚日大方喺facebook貼上噴血泳裝照，大騷35E超激凸身材，白雲喺水入面big波蕩漾，作婚前大解放！
白雲噚日透過WhatsApp話：「我哋揀咗明年10月29日擺酒，諗住去特別地方，如冰島、俄羅斯影婚紗相，但好多嘢未定，最重要都係keep fit先啦。」白雲嫁得風光，爸爸媽媽當然最開心，佢話：「去邊擺酒冇乜意見，反而最最最戥我開心係搵到個性格隨和、就得人嘅男友，佢哋覺得我真係好幸福。」
陸駿光加枱宴客
另一對新人「港版半澤」陸駿光同圈外女友茵茵亦將於今年8月22日擺酒，王宗堯噚日係微博貼合照，寫住：「以前都很害怕收到炸彈！但人大了，越來越想分享朋友的喜悅！恭喜你啊！哪喳，你終於結成婚啦！」陸駿光噚日喺電話度話原本打算擺22圍，但因為朋友太踴躍，所以要再訂多一邊廳：「budget有限嘛，但𠵱家可能超過30圍呀，王生（王維基）都有請。」
撰文：馮仁昭
