費清好多OL朋友都好會着高踭鞋返工，有啲係因為自己鍾意，有啲係公司規定。敝報都寫過好幾次着高踭鞋嘅害處，小則拗柴、拉傷韌帶，大則雙膝退化、生骨刺。唔通為咗美觀、儀態，就可以犧牲健康？
＃網上掀港澳矛盾爭辯
唔好睇小着高踭鞋對女士們造成嘅傷害，澳門銀河賭場最近就有員工反映，要求角子機女員工必須着高踭鞋返工，導致好多夥計腳踝關節疼痛難忍，被迫要辭職。所謂角子機員工（圖），行內叫「老虎妹」，就係負責為客人解答角子機玩法、換籌碼、餐點服務等，多數係女性。
費清問過澳門博彩最前線副理事長李國強，佢話的確係有咁嘅事。但係呢啲規定似乎係賭場老問題，積習難改。賭場資深荷官芳芳同費清講，本來金沙、銀河、MGM都有呢個規定，但後來經過員工爭取後，金沙和MGM都已經取消咗強制規定，𠵱家得番銀河堅持情迷高踭鞋。
呢個話題網上討論區引起咗激烈爭辯，兼夾延伸到港澳矛盾；有澳門網民話，啲香港商人想逼澳門人學香港咁，返工返到非人生活，最好OT又唔補錢！睇來澳門人都幾大怨氣，只係冇香港人咁公開投訴啫。
＃要生計，也要生活 ＃毋忘初衷
費清