《大時代》大結局前講到方展博決戰丁蟹，劇情話外圍有消息指美國可能出兵打仗，丁蟹趁亂做世界勁沽期指；方展博對賭就買升。其中一幕就講，方展博嘅證券公司女職員衝入房滙報最新市況話：「弊喇！美國佬加息，個市又跌多百幾點呀。」劇集首播期間、即係1992年，當時美國佬就冇加息，估唔到事隔23年劇集第3次重播，香港準備步入另一次美國加息。
上面提到嘅對白，的確帶出息率同股市走勢背馳嘅關係。書本理論講加息後資金有機會由股市回流到銀行，因銀行息率提升，存錢入銀行有回報，從而影響股市跌。另一原因係香港過往加息周期亦有出現，加息令供樓按揭貸款支出增加，對樓市同股市都屬不利因素。由於港元同美元掛鈎，所以美國息率走勢變動，本港息率幾乎拍住上。儲局今個星期二起舉行兩日議息會議，同本港股市同樓市去向係息息相關，投資者應該要為美國加息打定底。市場普遍預期儲局維持聯邦基金利率0至0.25厘不變，重頭戲將會係儲局主席耶倫於本港時間星期四凌晨舉行嘅記招，公佈政策聲明及經濟預測。睇番今年3月議息會議，儲局已經做好加息前奏，議息聲明刪除耐心字眼，又提到決定聯邦基金利率0至0.25厘區間維持有幾耐，就要睇充份就業同2%通脹實現及預期進展。如果儲局本月按兵不動，大家最想知道儲局將會對邊一項經濟指標作微調。
C+B
本欄逢周一刊出