信置（083）上星期開始推將軍澳一個新盤，太子爺兼公司執董黃永光（Daryl）噚日放假都親自落售樓處巡視業務。佢西裝筆挺、打條紅色呔出現，咁啱身旁兩位營業部高層，男嘅戴紅色呔，女嘅着紅色外套，襯到咁紅，唔通有玄機，寓意賣個滿堂紅？
信置呢個新盤確有唔少八卦元素，佢哋噚日加推168伙，令開售總數變成388伙；又揀喺本周四、即係18號早上8點45分開始賣，好多8字；咁啱Daryl噚日與營業部同事田兆源與朱美儀都係紅呔、紅外套現身，成件事夠晒紅、夠晒八卦。Daryl見到收票理想好開心，笑不攏嘴咁話「（售樓處）真係好熱鬧，好正」。