社會創新及創業發展基金推出首個食物援助項目，委聘協創機構打造「一站式」資訊平台，聯繫各區嘅食物捐贈者同食物援助機構，以助配對，畀更多基層市民受惠，呢個社福界OpenRice料明年首季推出，先於3個地區試行，以熱食服務為重點，檢討成效後再推廣至全港。
社會服務聯會前年一項調查顯示，熱食服務嘅受惠人數達1.35萬人。以惜食堂為例，2011成立初期每日提供30份熱餐，現增至約5,500份。社創基金秘書處代表劉冼靜儀話，全港現有17間機構喺125個地點提供食物援助，惟地點分佈不均，機構往往要跨區運送捐贈食物，運輸成本佔開支近半。
社創基金主席張仁良話，唔少食物供應商欲捐剩食但苦無門路，食物援助機構則要跨區收集食物，成立資訊平台就可以聯繫兩者所需，減低成本；平台同時提供物流資訊、受助人數據等，期望吸引更多機構喺各區開拓食物援助服務。
社創基金食物援助項目正招募協創機構，下月21日截止，今日舉行簡佈會。獲委聘嘅協創機構以自負盈虧模式營運，初期獲提供一筆不少於100萬嘅啟動基金，需達到增加受助人飯餐數目、減少浪費食物等目標。