早就預告咗政改會是一場Blame Game，上次泛民深圳之行會見王光亞、張曉明及李飛，就擺到明冇得傾，京官傳達「袋一世」、「票債票償」訊息，梁家傑會面後立即表示泛民否決政改冇懸念。而更可悲是一班所謂溫和民主派人士，為了一場早已預見的破局，而燒晒自己的政治資本，民主黨黃成智面臨被革走命運，狄志遠、羅致光也將失去民主派人士的身份。
走到今日，即使小修小補，改變提委會組成，加大民主成份，亦好難改變民意對立局面，而民意冇大變，從泛民內要撬走四票就十分困難。而剛傳出所謂三億買票，更加要鎖死泛民，等冇人敢臨尾轉軚，因為邊個轉就係收咗錢。如果要提早為政改做死因調查，一個最根本問題，係點解「談判」由開始到尾都冇傾過，所有溫和、中間落墨、整色整水方案都冇運行，完全冇得傾，甚至上深圳傾，原來係提早破局，其客觀效果竟然係催谷反對「袋住先」民意。所以，香港人會懷疑，中央由頭硬到尾，連溫和派亦夾死，是否早就唔想過，一鋪過收回上屆政府所取得的普選時間表。
梁特挑動對立不利和解
至於林鄭批評泛民誤判形勢，以為硬碰硬可逼中央讓步，佢諉過於人姿態實在太着迹，係人都知八三一落閘係始作俑者，一個比本地建制派還保守的框架，泛民有幾多位走呢？林鄭似乎忘記咗，佢個好Partner梁先生，三年以來無時無刻均寸嘴挑機、鬥爭為綱，要劃清界線鬥死泛民為目標。政改要成功，本來就要營造一個和解大環境，製造社會輿論畀泛民務實溫和企穩陣腳，亦要通過各種政治手段，令原本泛民支持者接受「袋住先」。建制群眾基本盤約佔五成，如果真係想令溫和路線抬頭，拆除綑綁，就要爭取兩成泛民支持者轉身支持政府，但梁先生卻反其道而行，一味鬥，社會氣氛越對立，泛民就越靠綑綁頂住，而中間民意就被迫要是但揀一邊，泛民群眾即使想「袋住先」，也因對梁先生極度反感而唔願意袋，至於政治色彩較淡的社會商界專業精英，為免被人視為「梁粉」而選擇沉默，來來去去就只有一棚冇公信力之紅色群眾、左派團體及政治僱傭兵撐，邊有說服群眾力量可言，只有自欺欺人。於是就出現了政府越宣傳做大龍鳳，越近表決，越多人反「袋住先」。所以，好多香港人認為，梁先生由始至終，就係拆爛污，將政改搞成「誰也不想過」的爛攤子。
中央冇特別理由推動香港民主化，否則何以其他各方面全方位收緊呢？又何以撐一個「過左」嘅特首去專搞局專搞政治鬥爭呢？至於林鄭三人組，乜都做唔到，累死民主黨妥協派羅致光、黃成智、狄志遠不特止，兼且hea做姿態更人人都知，路人皆見，到破局在即，林鄭又再擺出「良心論」，以為咁就過骨，其實此招式已用老，搵鬼信咩？
泛民本來都擔心民意撐「袋住先」，去到六成幾七成，變成袋又死唔袋又死，轉軚就得罪基本盤強硬年輕深黃群眾，但唔轉又冇咗泛民冇咁政治化嘅街坊支持者。其實只要台前戲子唔好太惡形惡相，出口傷人，開口埋口「Vote them out！」、「票債票償」，一味扮矮仔乞票博可憐，甚至俾反對群眾辱罵不還口，咁就可以玩殘泛民。此乃政治常識，乞人票仲寸夾惡，真係未見過。香港人「鄉愿」者不少，貌似忠厚而不分是非，鍾意睇無綫劇集《愛回家》，見到官員紆尊降貴去乞票，就會被感動。可惜，特區政府之不濟，連要求咁低都交唔到貨，講完！
政改已捉成一盤殘局，呢一刻大家都諗：「算把啦」，根本已冇人想過。
添馬男