中糧同中信系炒注資重組，升到甩轆，五礦系尤其地產旗艦五礦建設（230），一樣有注資concept，但未點郁，PB兼且係央企內房當中至抵買，有得諗。
資金憧憬注資重組，中糧食品（506）由3月到家陣，升咗94%；中糧油（606）翻過半番，系內內房大悅城地產（207）4月尾開波，家陣都累升咗68%。五礦建設又點？3月到家陣，升32%咁大把，由4月尾計數，更加係倒跌咗9%！
五礦系中港7隻股份，得五礦建設係內房。上年頭，前掌舵孫曉民就講明，母系五礦集團，會向五礦建設注資，可注規模高達300億元，兼且以中高檔項目為主。又雖則孫總榮休，新掌舵張元榮接任，但阿爺對央企改革重組注資大方向，無變過。所以，五礦建設注資呢壇製作，照計無變。
而隨住時間過去，注資可能性亦一路提高，上邊所講注資規模，係五礦建設39億元市值嘅7.7倍！
咪扯咁遠，五礦建設現價（1.16元）得0.48倍PB，上邊大悅城經呢期一支箭，PB講緊1.3倍。其餘三大央企內房，保利置業（119）0.51倍PB、中化系方興地產（817）0.81倍，華潤系嘅華潤置地（1109）1.5倍。講PB，五礦建設平霸！
又內地新鮮熱辣5月百城樓價指數，環比升咗0.45%，扭轉今年2月以嚟持續按月跌勢。阿爺放水減息，開始收效。五礦建設揸土儲4,680萬平方呎，相對本身市值，唔算少。連埋呢批土儲保守增值計數，五礦建設NAV已可加多1.4元（每方呎增值100蚊咁大把），去到3.8元，得0.3倍PB！
煲五礦建設，翻一番到2.3元，實際PB先得0.6倍，市值80億元，比起可注資規模，呢個市值，仲係好細奀。
錢雋
細價股專家
本欄逢周一、三、五刊出