上周六歐國盃外圍賽，可謂「戴帽之夜」，有三位球員都喺比賽中大演帽子戲法，認真威水。佢哋分別係葡萄牙嘅基斯坦奴朗拿度（C朗）、德國前鋒舒賀爾尼同波蘭中鋒嘅羅拔利雲度夫斯基。當中一向做慣風頭躉嘅C朗，仲自拍短片多謝球迷，同埋聽講佢已經應承皇家馬德里，就算下季由賓尼迪斯執教，都肯繼續留喺巴拿比奴，想撬走佢嘅豪門，起碼都要再等多一季喇！
喺I組排榜首嘅葡萄牙，上周六作客阿美尼亞，喺14分鐘先失一球，但之後C朗嚟料，29分鐘藉隊友摩天奴博得嘅12碼，操刀射入追平比分返回更衣室。直到換邊後55分鐘，C朗靠對方後衞解圍拖泥帶水，快門將一步將球挑入網，加上佢三分鐘後再喺禁區外勁射破網，個人連中三元，亦都幫葡軍擊敗喺後段追成2:3嘅阿美尼亞，繼續力壓丹麥居榜首。
傳C朗傾掂數留皇馬
由於上季喺皇馬時不滿傳媒玩針對，C朗至今都唔接受賽後專訪，今次因為難得幫國家隊連中三元，就自拍短片擺上網，笑容滿面咁多謝一班粉絲支持。心情咁好，可能因為佢同皇馬之間都傾掂數。早前報道話因為賓尼迪斯入主銀河艦隊，C朗可能會重新考慮前途，唔少歐洲豪門好似巴黎聖日耳門，想趁呢段時間，出手斟介呢位金球獎得主。不過，最新消息指C朗已經決定，至少留到2018年約滿先走。
其實賓帥喺上任後呢兩星期，已密密咁同BBC傾前途問題，好似上周五就去咗睇A組嘅威爾斯對比利時場歐國外，賽前同加里夫巴利會面，說服佢留隊，而盛傳走人嘅賓施馬，據聞都俾賓帥氹掂埋，𠵱家連C朗都決定留低幫賓帥打江山，我求大俠覺得皇馬球迷可放心。
羅拔仔四分鐘中三元
講番上周六同樣戴帽嘅兩位仁兄，舒賀爾尼就喺德國大炒「魚腩」直布羅陀場波，先喺上半場入一球幫球隊打好基礎，下半場再入兩球，最終幫球隊大炒對家7:0；至於羅拔利雲度夫斯基，就喺同組榜首嘅波蘭主場4:0大勝格魯吉亞場波，四分鐘內連中三元，但原來咁都唔係歐國外連中三元嘅最快紀錄，2000年時，土耳其嘅阿里夫艾頓喺對北愛爾蘭場波三分鐘入三球，所以羅拔仔只係第二快咋！
識睇，一定係睇足英台【英波Live】：
http://soccer.appledaily.com
http://bit.ly/engballlive