原籍潮州嘅泰國賓架R請吃飯，通知地點在灣仔盧押道21號鳳凰大廈四樓，剩係睇地址，左丁山一時之間接唔到線，因為平時連史釗域道與盧押道都分不清係邊一條街較接近中環。不過灣仔區好細箒，出咗灣仔地鐵站，望清楚之後，自修頓球場行去中環方向第一條街就係盧押道，唔駛幾分鐘就行到21號，到埗後，不禁啞然失笑，30年前呢間大廈不記得是否叫做鳳凰，總之一定記得以前就係灣仔著名酒吧Joe Banana嘅所在地，鄭大班搞中文Playboy與創辦「資本雜誌」（Capital）之時，寫字樓就喺呢度，當年左丁山經常來此與兩位負責編輯楊八妹（張寬義）及吳仲賢吹水，間中幫鄭大班度吓橋，當其時吳仲賢係「星島晚報」編輯，中午一點後就自九龍灣星島走過嚟開工，楊八妹係信報老總，在Playboy做到三四點就走番北角返信報（其實佢鍾意幾時返都得），同佢兩位傾偈，左丁山偷師不少，例如今日寫專欄，就有楊八妹嘅一啲影子手法，可惜吖，天妒英才，張吳兩位先後在九十年代仙遊，令香港報壇痛失兩位怪傑。
來到舊地吃飯，少不免緬懷當年情，不勝欷歔。上到四樓，呢間酒家叫做「古琴潮州酒家」，幾位夥計好面善，原來全是「佳寧娜」嘅舊人。賓架R話昔日佳寧娜總廚偉哥（胡俊偉）與六七個廚房同事一齊投效「古琴」，仲有經理鳳姐（譚美鳳）同幾位樓面過晒嚟，唔怪得開業幾個月，中午已有不少食客。有偉哥坐鎮，廚房自然有水準，頭盤鹵水鵝豆腐肥豬肉認真爽，花雕蒸蟹啲汁夠晒惹味，董事H要求留番啲酒汁嚟淋飯，不過之後有一碗潮州雜撈，每人一碗，內有帶子、鮑魚仔、魚片、潮州魚蛋及海參，食完一碗，已經飽晒，仲叫飯做乜嘢呀；跟住上清蒸沙巴龍躉，蒸得啱啱熟，滑溜無比，於是到「霸皇雞」上枱時，無人拿起筷子，賓架R話：「今晚我食晚飯就係靠呢隻雞。」然後原來還有煎兩面黃，嘩，唔食唔得，係偉哥撚手之作也。甜品有糖芋條，陳會長話：「你地食嘞，我戒糖！」哦，會長公子負責「降低食物中的鹽和糖委員會」，叫陳公子嚟食呢樣潮州家鄉美點，肯定有難度，我地齊齊將芋條表面嘅沙糖敲晒落碟，一啖咬落去，鬆化入口，粵菜甜品，無此美味。賓架R話與大廚係相交多年，一定支持佢，叫我地以後來食，撻佢朵喎。