【中環】曾與黃宗澤合資開甜品店而傳緋聞的「四洲太子女」戴凱欣（Kennis），真命男友終於現身。日前本報直擊她與男友拍拖，狀甚甜蜜。當日，身穿黑色背心白色短褲的她，與一名四眼男手拖手現身中環ifc，二人直到四樓平台食煙，其間二人有講有笑，之後Kennis先到餐廳攞位，而她的男友則落了商場，原來他去了買一束鮮花給女友，認真浪漫。二人醫肚後，便到連卡佛逛街，Kennis不斷試鞋，男友都有耐性及給予意見，但最後未有收穫，之後到停車場取車離開。
已帶男友見家長
記者昨日致電Kennis，她大方承認戀情，指拍拖近兩個月，並指男友姓范是上海人：「幾年前已經識，佢係做金融工作，都係打工。當日係我哋拍拖一個月，佢就買紮花畀我，𠵱家我同佢都會上海、香港互飛探大家。」
Kennis笑言跟男友好夾：「相識係緣份，冇諗過會同佢拍拖，時間到就出現。」問到她會視男友為結婚對象？她表示：「暫時覺得好OK，都係結婚對象，世界唔係絕對，但我好啱呢類型。」Kennis透露已帶男友見了家長，問她會否考慮閃婚，她表示：「見咗家長佢哋都OK，我唔會閃婚，啱嘅話會一年後結婚，之後都會享受吓二人世界先。」
採訪、攝影：羅德光
