歐洲足協下屆開始擴大法國主辦嘅歐國盃決賽周隊數去到24隊，雖然反應毀譽參半，不過就畀到好多歐洲二、三線球隊打入決賽周機會，上周五外圍賽B組榜首大戰，威爾斯靠加里夫巴利一箭定江山，主場1:0擊敗「紅魔」比利時，穩居榜首，歷史性晉身決賽周機會仲高唱入雲，真係令一班退休名宿好似魯殊、曉士、傑斯葡萄死。
肥賓觀戰巴利即士哥
威爾斯唔係冇球星，可惜實力唔夠平均，歐國盃未嘗打入決賽周，最接近一次都係04年去到附加賽，俾俄羅斯淘汰；對上一次踢世界盃決賽周，亦都要數番1958年，搞到魯殊、曉士、傑斯、比拿美等一代球星，與大賽無緣。
不過正所謂時來運到，威爾斯出到巴利呢個全球最高轉會費球星，國家隊隊運都當堂好番晒，上周五對比利時嘅大戰，其實全場受壓，控球指數同射門次數都差過客軍，多得比利時中場尼恩高蘭派大膠，25分鐘一次自殺式頭槌回傳，俾巴利截到即時轉身快射，效力車路士嘅門將泰拔高圖爾斯就算幾好身手都要失波。
巴利第50次代表國家隊上陣，取得入球兼贏波，仲要新任皇馬教練賓尼迪斯都有觀戰，喺新老細面前入波，巴利賽後開心咁話：「我哋準備工作做咗好耐，大家都完成部署，值得拎呢三分。」領隊高文都開心到震，話呢場係佢領軍以嚟最重要勝利，好有信心可以帶威爾斯進軍法國。
而且擊敗世界排名第二嘅比利時，對提升世界排名亦都好有幫助，以威爾斯現時排22位，有望打入20位之內，下屆世界盃外圍賽可望提升至第一種籽級別，遇上對手應該弱番啲。同日其他分組賽事，波斯尼亞就以3:1擊敗第三位嘅以色列，間接幫威爾斯鞏固出線機會。
識睇，一定係睇足英台【英波Live】：
http://soccer.appledaily.com
http://bit.ly/engballlive
五分優勢好穩陣
睇番B組形勢，威爾斯以14分排榜首，由於頭兩名都可以直接出線，領先以色列等球隊五分嘅威爾斯，餘下仲有一場主場對魚腩部隊安道爾，起碼可以再添三分，出線真係相當穩陣。相反擁有雙料英足先生夏薩特嘅比利時就樣衰啲，得番兩分優勢，一陣出咗局，就真係好瘀皮。