練馬師蘇保羅訓練「友瑩格」今季勝出三地之國際一級賽，威震馬壇，更有力問鼎馬王寶座，不過「友瑩格」下季將7歲，蘇廐未來邊隻馬有力接棒，成為新一代短途新星呢？
當然現階段仍言之過早，但插四班3歲未上陣的蘇廐馬「星之勇士」，晨課都幾搶鏡，此駒上月下旬已由雷神策騎，勝出快活谷大閘，當時用放頭跑法，走勢已經好熟練，有一定作戰水準；相隔三個禮拜，「星之勇士」這天又由雷神操刀，參加快活谷第六組1000米大閘，呢次唔放頭，改留後上，內檔慳位末段騎落反應甚佳，彈甩「邦之星」掄元，「木子年華」跑第三。
「星之勇士」經過兩次谷閘，試準晒前速及後勁，可以話已經準備就緒，隨時可以出擊。此駒喺快活谷轉急彎表現敏捷，而同父馬「龍華太旨」更係六勝谷草，所以有理由「星之勇士」未來亦係谷草專家。