南韓發生MERS，中台港星四地非常緊張，極注意往返南韓嘅班機上乘客，一有發現發燒症狀，就送往隔離，呢四個地方在沙士期間，人命及經濟皆有損失，現在見到新沙士浮現，官方衞生機構唔緊張就假嘅，萬一MERS侵入，部長局長就會被痛罵失職嘅嘞。但世界衞生組織就好整以暇，絕不緊張，似乎覺得香港等地反應過敏㖭，原因大概係一位研究MERS嘅權威Dr. Stanley Perlman（今個月在Lancet與其他人共同發表一篇詳盡檢視MERS嘅論文）公開講：「唔駛咁緊張，MERS並非一隻傳染性強嘅疾病。但我明白公眾之恐慌心理。」呢隻病主要影響體弱老人，年青小伙子染病機率比較低，2014年沙特阿拉伯有280人與患病者同住，只有4%受到傳染，專家話：「如果你冇去過沙特阿拉伯，冇去過南韓醫院，唔駛驚住先喎！」
首爾有兩間醫院係重災區，一間係三星首爾醫院，一間係St. Mary's，香港遊客唔會去啩？點解醫院係傳染災區呢？原來我地香港醫院地方細，病人多，家人探病要限時限刻，極少陪伴病人左右。南韓就唔同，南韓醫院病房預埋位置俾病人家屬留在病房內，家人可替病人換衫、抹臉、抹身，照顧到無微不至，直情係長時間極近距離接觸，所以傳染家人比較容易，但在社區內，第三層次傳染就仍然未爆發，故此Perlman醫生並不以為有需要叫學校停課。
話係咁話，香港見過沙士就驚晒，MERS暫時無藥可醫，無針藥可預防，正確傳染渠道亦不可知，專家話唔駛驚，我地普通人就認為小心駛得萬年船，暫時唔去南韓，唔去中東，並無損失，改去其他地方旅行，都一樣好玩嘅啫！寫到呢度，手機顯示大量WhatsApp，打開一睇，不同朋友紛紛傳來蘋果日報網即時新聞網頁，知道青衣城有疑似新沙士個案，蘋果網一講全港轟動，再望吓now 333台，只見恒生指數急速下跌，沽貨都沽唔切，真係駛唔駛咁驚青呀？但係經歷過2003年沙士之後，香港人見過鬼怕黑，有杯弓蛇影心態，係可以理解嘅。
呢兩三日，衞生防護中心公佈，所有疑似個案中，全係虛驚，大家唔駛恐慌住，自南韓及中東回來嘅遊客，或者要小心啲。