【專題籽：港情港趣】之前高官落區宣傳政改，釀成公關災難騷，推高花生價格。高醫生小學雞式「講完」就閃人、飲茶阿姐妙語K.O.唔介意中央幫佢揀老婆的陳智思與人形垃圾筒，不過最迷離的要數政改三人組花車巡遊式落區，真係時運高先望到。仲有幾日，政改方案就於立法會表決，呢三個「奸人」盡力向市民解釋假普選之禍，腳踏實地落區派傳單。你話，邊個先係真心奸？
尼采話好多真理都是以笑話形式講出來。特區政府先天缺乏幽默感，高官那種令人失笑的是低智鬧劇，不是笑話。「大專政改關注組」與「青年重奪未來」兩個社運組織成員醜化自己扮高官，組成政改奸人組，用假身份諷刺假普選，希望笑聲笑聲傳達真理。「我哋想用輕鬆方法拍片諷刺政事，吸引相對冇咁嚴肅的群眾。」他們模仿「有商有量」宣傳片，改對白照辦煮碗拍一條，好鬼抵死。
這天晨早8點，他們已在化妝，準備變身殘廁源、行騙月娥及強國猿堅落區。眼都未開的我望見三人眼仔碌碌，慚愧又戥他們辛苦。讀緊大學的Peter仔笑時有酒渦，所以被委派扮林鄭。戴胸圍、着絲襪、笠假髮，穿高跟，佢話體會到女人之苦。要林鄭上身，佢話最緊要眼睛周圍碌，時不時一邊嘴角揚起奸笑，兼偶爾黑面。扮殘廁源的大學生阿羊一樣慘，黐頭套熱到核爆，扮完要撕番出來扯到皮都甩。重點是因為經費問題，濕夾臭的頭套要重用再重用！「佢哋個個都建議我剃頭，但我還是覺得有頭髮比較好，因為將來大把機會沒頭髮。」相對起來，扮演強國猿、做文職的阿龍較輕鬆，妝髮簡單，再戴副老花眼鏡就搞掂。三人化妝整頭搞足兩個幾鐘，真係殊不簡單。
認真過班官
攝氏34度的正午，穿短袖衫的我幾乎熱到溶，着西裝及套裝的他們卻面不改容，在深水埗排檔揮手say hello派「2017靠佢死得」傳單。以為只有年輕人才支持他們，當日見到不少大嬸、阿叔都跟他們合照講加油。年輕的溫先生有看過他們的短片，他說：「咁曬咁熱，佢哋腳踏實地喺條街度行，嗰班官坐架旅遊巴，離地咁遠，佢哋真係辛苦好多。」A貨聆聽民意，真身只懂漠視，世道實在荒謬。
他們落區會遇上支持市民，但同時也會被撐政府的人罵。當天就有一名檔主對他們講粗口。奴性強店主話「唔應該忤逆阿爺」、「我為甚麼要提名？台灣也有選舉，一樣選出大貪官。」、「叻人統治蠢人係應該」、「梁振英同曾蔭權都做得好好。」我表示膠都費事派。他們EQ高過高醫生好多，堅持耐心說道理，至對方開始無理取鬧才離開。阿龍說：「落區是為了引人注意，但如我哋沉唔住氣，同佢哋謾罵，效果就唔理想。」Peter仔補充：「我們關注組經常『洗樓』解釋政改，成日都接觸到藍絲市民，久經訓練，慣晒。」
問他們家人朋友有冇睇片兼笑到反轉，Peter仔笑謂：「同學都唔認得我，有次朋友在WhatsApp group分享咗我哋條片，都冇人發現係我。反串look唔敢畀阿媽睇呀，佢可能會笑到爆炸，但也可能會爆血管。」食住條水，搵人扮埋689、經常指指點點的王光亞、李飛等，玩得更大，可能抽得仲應。「其實我男扮女裝，都唔知大家係咪接受到，街上有些人會話我人妖，唔知係講笑還是真係覺得嘔心，我哋仲測試緊市場口味。」
看過他們之前拍的一條短片，形容假普選唔只有篩選，仲係「阿爺吮完畀你吮」，片中Peter仔飾演的行騙月娥在吮二手雞骨，同𠵱家個方案一樣咁核突！香港人，袋，你就輸一世呀。
記者：葉青霞
攝影：潘志恆
