喺《蠱惑仔》系列電影入面，銅鑼灣揸弗人叫陳浩南，勢估唔到家陣喺馬場，亦有位皓楠開始上位，佢就係見習騎師黃皓楠。
連埋禮拜三隻「王將」，唔經唔覺皓楠仔今季已贏咗八win，上次沙田日賽仲憑「故事」同「麟轉乾坤」起孖，可見跑到季尾，十磅仔威力唔細。
周日(14日)皓楠仔騎八場，邊隻馬最好呀？梗係第九場「忠心義氣」啦！至今唯一頭馬正係田草1000米直路賽取得，當日用何澤堯只孭114磅勝出，上仗則於谷草1200米得亞軍，持續有好成績，呢場擺皓楠仔上去減十磅，負115磅只比贏馬一役重一磅，你話係咪好着數先！
皓楠仔另一匹餐士馬係第七場「星夢」，呢隻馬一向靠放食糊，今場只孭107磅，仲要跑利放嘅B加2跑道，再一次放到有乜奇呀！
皓楠！皓楠！今次捧你收錢唔難！