【政改倒數3天】
【本報訊】從2013年展開諮詢，2014年7.1預演佔中，再經歷79日佔領行動，加上無日無之的政治爭拗，1,200人提委會篩選候選人的政改方案，終於來到提交立法會表決階段。表決前夕，抗爭者各有話兒；一旦否決之後，修改《基本法》、制訂約章以至成立影子政府，民間公投選出民間特首，或是港人重奪未來的可行之路。
記者：馬志剛
雨傘運動過後，佔中三子之一陳健民坦言對新一代改觀，「過往成日覺得呢一代寵壞咗，事實上佢哋面對催淚彈、面對警棍，其實好勇敢，嗰種決心超越咗好多香港人嘅想像」，許多專業群體、傘後團體也逐漸成形，「我希望返番去寫作、思考作為主要工作方向。如果冇人肯再走出嚟，我唔會覺得自己可以向後退，但𠵱家有人持續」。
和平非暴力抗爭至今未換來實質成果，有人訴諸勇武，也有人洩氣失意。陳健民說，運動完結，社會分成激進化、本土化、犬儒化3個走向。犬儒化集中在中產階級，無力感重，寧可移民，「其餘兩種，都喺年輕人中間發酵得好快。溫和民主派同北京講咗10幾年道理都唔聽，仲同你講道理做乜？大家咪鬥力囉，走向激進化其實係好自然」。
政改方案周三提交立法會討論表決，有人擔心泛民中人重演5年前的臨門轉軚，陳健民指，若方案通過，而投票支持的泛民議員無合理解釋，原因只剩下威迫利誘，「民眾點會唔憤怒」，更可能觸發新一輪佔領。
政改否決難激發佔領
如政改否決，陳健民指看不到有足夠民氣激發再次佔領。哪民主路應如何走下去？陳說未來兩年的區議會、立法會選舉，不只是民意戰，更是一國兩制較勁，「京官都講明如果唔通過，就係敵我矛盾，一定會開盡機器消滅泛民。如果立法會選舉三分一（議席）都頂唔到，出年（政府）可以突然將政改方案翻叮」。
他更明言，泛民應積極考慮更新政黨，這是逼切問題，「50歲以上嘅議員，請你們退下來吧」，讓年輕泛民接棒，共同語言更多，更易與公民社會連接，「英國大選，四個政黨黨魁都係40幾歲，點解泛民唔可以更新？民建聯都更新咗啦」。
公民社會除支持選舉，也應該思考更多可能性，他希望不同群體可以在各自領域，思考有甚麼價值一定要捍衞，有甚麼行動方案，再連成一線形成社會約章，變成一場運動。「當我哋唔可以再靠政府、又唔可以靠財團時，民間力量要諗吓，點樣令香港做得更好。」
