今期(14日)重頭戲第八場三級賽1400米精英盃，大家嘅視線都集中喺摩廐馬海戰術身上，估計大熱一定係「新力風」，一來上仗沙田銀瓶實在贏得好easy，二來雷神繼續騎，亦給予馬迷信心。而大摩另外兩隻，李嘉欣愛駒「一寶」上場跑第二有回勇迹象；至於「駿馬名駒」曾經與「步步友」串Q，今次跑1400米更係首本路程，所以唔少馬迷覺得今場大摩可以包辦三重彩。
不過有匹馬唔可以忽略，就係「馬場王苑之」陳穎怡旗下嘅「隨心隨意」，今年元旦日受讓兩磅下，喺1400米只輸短頭位畀「駿馬名駒」屈居亞軍，今次受讓擴大至11磅，如果大家認為「駿馬名駒」有分量，咁冇理由「隨心隨意」嘅機會差得過佢！
今季「隨心隨意」最具話題就係前仗1000米直路賽，好多人話觸線一刻明明「隨心隨意」影贏「新力風」得季軍，一過終點重播慢鏡，馬會評述員亦話「隨心隨意」第三、「新力風」第四，但最終賽果卻係「新力風」跑第三，「隨心隨意」第四，搞到網上巴打賽後極之嘮嘈。
翻睇幾次真係好似「隨心隨意」影贏，的確令人幾迷惘，但講真馬會又冇理由搞錯！撇開呢件事。嗰場顯示「新力風」、「隨心隨意」實力相差唔遠，今次「新力風」熱一大截，但1400米反而唔及「隨心隨意」有根據，所以後駒真係值得一博。