新一屆青年民建聯委員會噚日宣佈正式成立，前主席周浩鼎正式交棒畀民建聯觀塘區議員顏汶羽。周浩鼎係《城市論壇》之友，經常代表建制陣營同泛民開片，今次佢交棒亦都將呢個衣鉢傳埋畀顏汶羽，仲話對顏汶羽充滿信心。
成班青民聯噚日殺入立法會搞大龍鳳造勢，但係得民建聯主席李慧琼、議員葉國謙、黃定光、陳鑑林同埋葛珮帆現身撐場，其他大佬除咗譚耀宗好遲至出現外，一律唔見人。
佢哋成班先走咗去立法會5樓空中花園影大合照，然後再聽黨主席李慧琼分享內地演員張靜初，如何朝夢想奮鬥嘅勉勵小故事。周浩鼎上位靠《城壇》，家陣輪到顏汶羽，顏汶羽似乎幾有信心，明白需要喺廿幾卅秒內講出政策重點，又要反映到青年人心聲，所以今次青民聯仲整咗個新facebook專頁，叫做「young DAB」，大家有興趣可以去𥄫𥄫。