政改終於去到決戰時刻，負責睇住主戰場立法會大樓嘅秘書處極度緊張，呢輪密密同唔同黨派議員商討下個星期三至五，即係辯論政改方案時嘅大樓保安安排，話要封呢度封嗰度，但係秘書處話由下星期三開始，要封埋立法會一樓間餐廳，同埋五樓議員用嘅咖啡閣，就真係搞到天怒人怨，特別係一班議員助理，有人話咁搞即係想佢哋「佔領」金鐘啫！仲有人話係咪要逼佢哋係立會BBQ同打邊爐！
200人佔領金鐘食肆
正所謂茶煙飯足、勢如破竹，成座立法會大樓內，有熟食嘅地方就係得呢一樓餐廳同五樓咖啡閣兩處，而餐廳係佢哋200個議員助理同職員醫肚地方，事關立會周圍一係得麥記、一係貴價餐廳，根本冇地方食嘢，仲要成日有排等，𠵱家秘書處話餐廳閂門3日，佢哋一係帶飯返去食、一係出街食，即係斷佢哋衣食啫！
有助理同八方講，班尊貴議員有到會食，封餐廳梗係「話之你」，但佢哋唔係人人有愛心飯盒，出街食貴同等餐死，而且200個立會議員助理同職員湧去金鐘搵食，咪即係叫佢哋「佔領」金鐘食肆！而且佢哋咁行出去，可能俾建制派屈幫手佔領，再唔好彩啲俾班藍絲打又點算先？係咪秘書處負責先！
有議員助理仲同八方講，一係你班尊貴議員夾錢，呢3日請晒議員助理同職員食到會，「總之你哋食乜我哋食乜」，一係佢哋帶埋炭同石油氣，一於係立會BBQ同打邊爐，到時咪話佢哋冇事先講明！
李八方
mailto:[email protected]