立法會有個審議關注場外衍生工具嘅小組噚日選主席，一開波按慣例先由資歷最深嘅議員、即係金融界吳亮星主持，咁經民聯張華峰就順勢提名亮星星啦，然後就需要一位議員和議，點知成個小組都係得3個人，換言之佢哋要靠唯一一位泛民議員、民主黨單雞和議喇。
當張華峰催單雞和議時，單雞好淡然咁話「我唔和議吖」。咁點算呀？亮星星咪變陣提名番張華峰囉，呢次又輪到張華峰話唔接受提名。卒之亮星星死死地氣提名單雞，單雞又擺款話要諗吓先，諗咗一陣，接受啦，張華峰和議，變咗由單雞做主席。
單雞事後話諗番都覺得好笑，仲話其實只係有責任去做審議法例嘅工作，冇責任去和議其他議員做主席囉。