早排網上流傳一段由Carrie Lam上載、名為《2020家書》嘅短片，扮政務司長林鄭月娥講政改方案通過後，香港仲衰過冇普選，入面嘅「林鄭月娥」退休後做咗行會成員，但都阻止唔到，仲話追悔莫及。
《AM730》噚日登咗林鄭訪問，佢話片中情景梗係唔會發生，包括唔會做行會成員，同埋唔會返英國退休，因家人已返晒香港。
林鄭又喺訪問入面話，今次推政改失敗令佢好失望、好唔開心，仲話完咗政改對佢係一個解脫，又話過去幾月發覺好難做得成事嘅時候，就會問自己係咪做得唔好呢，有時會問到自己更加唔開心。
政改仲有唔夠一個星期就表決，林鄭好快可以放鬆，唔使再孭呢件吃力不討好工作。