每場開波前見到勒邦占士召集全隊圍埋一齊，發表演說激勵士氣，都會覺得大帝勁有霸氣；不過，今場睇到佢整理條褲嗰陣，意外露出私人部位，做埋全國直播都面不改容，呢啲先係世界級。有啲巴打上網睇番未打格嘅相，話覺得好自卑喎。
花絮︰史密夫潮爆「踩」場
騎士後衞JR史密夫（J.R. Smith）出名潮，今場開波前就踩住價值1,500蚊美金（約11,600港元）嘅美國最新潮物PhunkeeDuck電動滑板入場，但有人見到佢差啲仆低；最終佢全場12射兩中得四分，認真失威。
花絮︰狂牛兵係勇士吉星？
各大足球聯賽已經休季，沙比阿朗素、艾比路亞同卡利祖兄弟四位西班牙球員，趁住放暑假去咗美國度假；周四就去咗騎士主場欣賞呢場大戰。前三場戰情緊湊，但佢哋一去現場睇波勇士就大勝嘞。
