容祖兒日前現身蘋果「我Q你答問會」，接受15位在銅鑼灣行街的讀者提問，她叫大家：「放馬過嚟，我等接招。」有人關心祖兒幾時結婚？現年34歲的她即場開出38歲嫁人的期票，希望將來生一個女兒，被問到男友劉浩龍最鍾意食她煮的哪道餸？祖兒都大方爆料是無敵溫柔蒸水蛋。
採訪：皓騫、魏嘉琳
服裝：Calvin Klein
化妝：Hubei Har
髮型：Heibie Mok and Jacky Tsui of Hair Culture
場地：尚品薈
1.Jessy：你覺得自己似唔似Angelina Joey（Jolie）？
祖兒：哈哈！佢好笑，佢話Angelina Joey喎，我好難咁講喎，有一兩個人咁講過囉，但好難同佢比，佢係我心目中無敵女神，我哋共同地方都係女性，口都係比較大啲，其次我差佢好遠呀。
2.郭小姐：你會唔會好似阿Sa咁挑戰拍《雛妓》？
祖兒：《雛妓》真係好大膽，但我諗我拍唔係《雛妓》，而係《飛越瘋人院》嘅方向，睇過一套講神經病，幾有興趣挑戰呢方面，重複做阿Sa做過嘅唔好玩。
3.梁小姐：你有冇諗過效法譚詠麟唔攞獎呢？
祖兒：自己都覺得𠵱家做頒獎禮心態唔同以前，講真公司同傳媒合作，真係有賴佢哋支持先聽到我嘅歌，一年嚟佢哋幫助，用出席頒獎禮報答，咁樣心態出席未嘗不可，如果好忙接晒嘢做skip一年囉。
4.Sherry：你會唔會畀貓貓上床瞓覺？
祖兒：我死淨一隻貓，佢同賓賓最friend，以前嗰隻就會上床瞓，𠵱家冇呢支歌仔唱，好掛住我隻貓。
5.歐先生：師兄（劉浩龍）最鍾意食你邊道菜呢？
祖兒：蒸水蛋，無敵溫柔蒸水蛋，好滑。
6.陳小姐：聽聞你唔食馬蹄同紅蘿蔔，仲有乜嘢唔食？
祖兒：馬蹄好爽好多汁好鍾意食，紅蘿蔔嘅味覺得好怪，但近年好多以前唔食嘅都食，好似蒜頭、洋葱、葱，聽講話通常有呢啲改變，代表你老咗，我好不情願地接受呢個現實，但𠵱家仲未接受到芫茜，所以未去到老到返唔到轉頭地步，OK嘅。
7.盧小姐：我想問祖兒沖涼會唔會唱歌㗎？
祖兒：以前細個會囉，但自從有更大舞台接納我後比較少啲，試過喺屋企唱歌俾樓下投訴，所以我唔會再唱歌，真㗎，嗰輪我做騷喺房駁卡拉OK，看更上嚟屋企話樓下投訴太嘈，咪唔唱囉。
