英超兩大豪客曼市雙雄，大把錢買人，今夏不愁傳媒炒作新聞，其中傳聞皇馬收番10億港元，畀加里夫巴利重返英超投紅魔，夠晒話題性。
紅魔24億擴軍
紅魔有米，據報會有二億鎊、即係24億港紙畀雲高爾繼續擴軍，迎接重返歐聯嘅大日子來臨，轉會新聞，估計佢哋今夏會冠絕英超，甚至歐洲。鋼門迪基亞走人似成定局，又話會撬熱刺嘅法國鋼門洛里斯替補；前線法卡奧鬆人，尹佩斯會係下一個，雖然有「小豆」查維亞靴南迪斯借用皇馬期滿後回歸，仲有雲帥自己友、荷蘭新星迪比加盟，但曼聯依然求「鋒」若渴。
昨天就話要皇馬用賓施馬同法比奧干查奧，交換迪基亞，今天就到文迪蘇傑從馬體會加盟，無日無之，魔迷興奮；以現時「大聖爺」加里夫巴利嘅身價，雖然啱啱喺皇馬效力嘅第二季，比首季稍失色，不過正值25歲黃金踢波年紀，唔會點跌價。要用曼聯今夏接近一半嘅軍費簽入，值唔值，問雲高爾最清楚；不過從未公開講過要離開皇馬嘅巴利，唔應該急於重返英超。
由銀河艦隊去另一支揮金如土嘅「銀河艦隊」，其實沒有兩樣。曼聯自費爵爺走後，大變是常態，但中前場點科水買人都好，問題會出喺防守上；基斯史摩寧拍菲爾鍾斯呢對土炮雙中堅唔穩陣，冇埋上季平均每場聯賽作2.5次撲球嘅迪基亞，紅魔就算踢得番歐聯，甚有大賽命嘅「大聖爺」要加盟都要三思。事關英超唔同西甲單打獨鬥格，競爭激烈得多。
巴利藍斯好合拍
皇馬都變緊天，換上「半個英超人」賓尼迪斯主政，將有迪基亞把關外，基斯坦奴朗拿度都過咗30歲，一人球隊格局料有變；首季加盟即喺西班牙盃決賽同歐聯決賽入波，幫皇馬捧兩大盃嘅巴利，已證明適應當地水土。威爾斯人上季只比首季少兩個聯賽入波，適當時候自私，係每個球星必備質素，皇馬球迷噓幾吓，唔會係走嘅理由。
想踢得開心，返威爾斯見番一班由09年起，自小並肩作戰嘅同胞一定愜意。貴為隊長，25歲嘅巴利，周五喺國家隊迎戰世界二哥比利時嘅歐國外，已經會係佢第50次為國披甲，大把世界；雖然剛過去球季，踢阿仙奴嘅艾朗藍斯越戰越勇，形象健康負面新聞近零，星味漸濃，但兩將合拍國家隊從未見不和。
一個中場自由人，一個喺前線搵食，距離帶領國家隊自1958年，首踢國際大賽越走越近，戰意如虹；碰巧歇暑前，比利時有高柏尼同費蘭尼兩大主將缺陣，今晚就直取兄弟波嘅威爾斯「讓球主客和」[+1]。
文：波神