立法會前日發生議員辦公室俾示威者「衝入」遞信，議辦助理「人身安全受威脅」一事。花生友講緊嘅係前日新民主同盟范國威帶咗班中大同學去民建聯位於立法會大樓6樓嘅辦事處，向身兼中大校董嘅葛珮帆遞信，邀請對方出席下周一喺中大舉行嘅政改論壇，葛議員事後譴責范國威冇預約就帶人去議員辦公室，仲質疑大樓保安出現漏洞。呢場小風波喺議員間引起討論，泛民議員私下都話咁做唔多好，調番轉頭建制搵愛字頭殺上泛民議辦，到時大家又出唔出聲好？
正當建制議員齊心聲討之際，有心水清嘅人就翻舊賬，話早前經民聯梁美芬帶同助理喺立法會洗樓，派為政改印製嘅「齊來鬆綁」書籤，呼籲泛民支持政改，當時泛民嘅議助唔多受落，仲質疑梁嘅助理違反立法會規定，去所屬政黨以外嘅樓層。
白鴿黨facebook噚日就提出「只許鼠王派書籤 不許其他人遞信?!」嘅質疑，仲話上次梁美芬搵人去其他議員辦公室，派有印有佢個樣嘅書籤都嚇親，「覺得自己人身安全受威脅同好驚囉！」不過，建制議員就反駁，梁美芬係叫助理到訪各層，話晒係立法會工作嘅職員，同示威人士係兩回事喎。
事件主角、中大學生組織「中大諗」就發聲明，澄清佢哋6名成員只係想希望親手交信畀張宇人同葛珮帆兩名中大校董，冇喺大樓內示威，更加冇威脅議辦職員安全，過程中雙方一直以禮相待，但如果打擾到職員工作，深感抱歉。
花生友