曼聯門將迪基亞過檔皇家馬德里，相信只係時間嘅問題，除咗要傾掂轉會費之外，迪基亞一直都想皇馬確保佢有正選打，因為佢想代表西班牙參加出年嘅歐國盃。為咗𠱁掂迪基亞，據報皇馬出手勸走卡斯拿斯，仲話願意補貼卡斯拿斯離隊後嘅人工。
國家隊面左左零交流
為咗皇馬正選龍門呢個位，西班牙傳媒話卡斯拿斯同迪基亞已經面左左，冇偈傾嘞。好似日前嘅西班牙國家隊集訓，佢哋兩個雖然喺停車場撞到，但係連招呼都冇打，各自幫球迷簽名、各有各行，好似互不相識咁。就算入到訓練場，佢兩個都冇乜交流。迪基亞好想去皇馬，但話要有正選先去，逼皇馬踢走卡斯拿斯。搞到咁，佢哋點可能有偈傾！
西班牙《阿斯報》爆料，皇馬已經作出取捨，落足嘴頭兼利誘，勸到卡斯拿斯離隊。𠵱家卡斯拿斯同皇馬仲有兩年合約，稅後年薪有成800萬歐元，成7,000萬港紙，真係冇乜邊間球會出得起呢個人工，所以皇馬為咗迪基亞，決定貼錢都要送卡斯拿斯走人。報道話，如果卡斯拿斯離開、新球會又要佢減薪的話，喺嚟緊兩季，皇馬會補貼番佢嘅人工到800萬歐元，維持番佢喺皇馬嘅待遇。皇馬之前都有貼錢送走功臣，例如當年魯爾離開，同史浩克04簽約兩年，魯爾年薪有700萬歐元，其中200萬歐元係由皇馬出嘅。
7,000萬年薪皇馬包底
卡斯拿斯今年34歲，近兩年狀態雖然有啲跌watt，但仍然係一流門將，所以大把球會吼實㗎，據報至少有10間，例如阿仙奴、費倫巴治，就睇吓佢鍾意去邊度。搞掂卡斯拿斯之後，迪基亞嘅轉會就進入最後直路，《馬卡報》話迪基亞已經非常接近加盟皇馬，呢單交易可能喺下星期落實。由於迪基亞同曼聯得番一年約，所以轉會費唔算好高，基本轉會費2,500萬歐元，再加埋500萬歐元嘅浮動條款。
識睇，一定係睇足英台【英波Live】：
http://soccer.appledaily.com
http://bit.ly/engballlive