互聯網上嘅玩意認真千奇百趣，近排又流行咗一種新玩意，就喺從背後反手摸肚臍，聽講話呢招可以證明自己身材好，結果唔少靚女即刻加入，好似李蘊先喺facebook上載兩張相，佢將短袖衫捲起變成露腰衫，然後再左右開弓反手摸肚臍，結果兩隻手都成功做到，李蘊好開心咁舉起V字手勢兼留言話：「網上看到有人說反手摸到肚臍等於身材好？我可以，但不覺得身材有多好，大家試試吧！但要量力而為，別扭傷腰喔，哈哈。」
楊冪玩上癮
做咗人妻兼媽咪嘅楊冪，亦有跟住加入呢個行列，佢着住牛仔短褲露出平滑小腹自拍，見佢小蠻腰又真係幾索，完全唔似啱啱生完B咁，又真係抵畀個like，噚日佢喺內地出席活動，亦忍唔住即席表演。玩玩吓連名媛何培倩都玩埋一份，佢貼咗張成功相之後留言：「Interesting test. I can do it. 」不過查實呢招，只係考驗身體柔韌度，同身材好唔好無關，真係咪亂試，小心出事呀！
撰文：馮仁昭
