早幾日有個民調顯示，現屆選舉委員會中，最多人提名做特首選候選人嘅係梁錦松，排第二就係葉劉淑儀；𠵱家做緊特首嗰個就排第三。葉劉噚日接受李鵬飛訪問時，飛哥問葉劉有冇意思去馬，葉劉即刻耍手擰頭唔答，話𠵱家太早喇，佢驚答咗就有人唔敢同佢來往，又驚得罪人，怕變咗生人勿近。
雖然葉劉唔講選唔選，但又好多睇法分享喎，譬如下屆特首要係乜人？佢認為就係嗰啲「比較團結（到）社會嘅人」，因為家陣社會撕裂嘛，跟住講到行政立法關係，佢仲話「立法會可以反叛到咩程度，我認為亦都睇政府嘅施政」，即係施政唔公平、唔合理、令市民憤怒，立會梗係囂張啲啦！