今個禮拜日(14日)舉行今季最後一場分級賽1400米精英盃，用B加2欄作賽，睇番上季精英盃賽日，亦係用B加2跑道，當日明顯走內叠較佳，除了「永神駒」、「金碧陽光」及「喜蓮標緻」貼欄放頭帶到之外，就算居中後上建功之馬，如「津津樂道」、「世界都市」、「芙蓉之威」及「貝利奇」，亦係沿途守內叠慳位留力，馬匹走外叠多數蝕唔起，所以千祈咪行錯路，今期宜優先留意中內檔馬。
今戰列陣馬中，第三場「世界都市」兩次贏馬都係田草B加2欄，其中一次正是上季精英盃賽日，揀番同日上陣兼抽得二檔，有力重溫好夢。另外，第七場「金碧陽光」係全場唯一贏過田草B加2欄嘅參戰馬，憑較佳場地性能，有機會重開勝門。