雷神莫雷拉復出了！停賽三期之後，雷神今期(14日)跑足11場，睇個勢似大開殺戒，好似時廄「金獅福將」呢啲上仗跑得接近而今季未交代嘅馬，唔搏甩髀就奇咯！
練馬師方面，大摩今期豪出15駒，似希望一鋪打沉方嘉柏、蔡約翰，擴大榜首領先優勢，不過大摩個用人排陣有啲奇怪，睇番雷神停賽前之5月份，大摩9場頭馬中有6場即三分二由雷神經手，但今期大摩15駒，卻只有「大家熊」及「新力風」配雷神，完全唔成比例。大家應點樣拆局呢？
當中有幾個可能性：
第一，大摩有部份馬贏得但唔益雷神，好似「田黃」一早畀韋達霸住嚟試閘，已試到準晒立心一出即勝，無謂臨時飛起韋達。
第二，根本除咗「大家熊」及「新力風」，大摩其他馬都一般，所以雷神唔騎。
第三，並非大摩啲馬唔好，而係雷神有更佳選擇，好似第七場雷神嘅蔡廐「華恩庭」，公認實力大超班，又試過大閘勝出先再跑，機會明顯好過同場摩廐「太皇鷹」。
綜合以上分析，感覺第三個可能性最高，大摩今期嘅馬，的確只有「大家熊」及「新力風」最可信，尤其貴價馬「新力風」，馬主一定未回本，不遠征英國留港爭連捷，必鬥志如虹，只負123磅加個2檔，當然不可輕視。