早幾日人行出咗個報告，將今年GDP增長預測下調至7%，其中固定資產投資增長預測下調至12.6%，社會消費品零售總額增長預測下調至10.7%。與國統局啱啱公佈嘅數字比較，首5個月全國固定資產投資增長降至11.4%，個趨勢仍未止跌，5月社會消費品零售總額增10.1%，較4月回升0.1個百分點。
若果要達到人行預測數字，固定資產投資下半年不單要止跌，仲要回升先可以有望達到，至於消費品零售總額亦需要進一步增加。
睇返近兩個月基建股嘅表現，一帶一路概念，似乎有炒到爛嘅迹象，由博鰲論壇到而家，主席習近平出訪咁多次，次次都憧憬，乜鬼嘢前景都反映晒出嚟啦，無乜力上之餘，走勢都唔係幾好。
其實大家起勢係咁沽基建股嘅時候，發改委唔覺唔覺已經批咗成6,000億元人仔嘅基建項目，單計星期三，一日就批咗成千億元項目。新6,000億元基建項目相當於5月基建投資規模2.92萬億約20.6%，刺激成效如何有待觀察，但呢6,000億元人仔投資肯定會未來陸續流入實體經濟。
流氓