今期（14日）沙田尾場二班1600米，只得12駒角逐，差兩隻先滿額，但由於明星馬多，依然有睇頭。其中葉廐「聰敏不凡」季內已取四冠一亞進步驚人，但今次孭133頂磅兼排11檔，都係障礙所在。
至於蔡廐「詠彩繽紛」，乃打吡落敗後復出首戰，亦會受到注目，隻馬最近試閘跑個冇威脅嘅第三，走勢不過不失，雷神肯騎當然有其道理，但始終久休復出，話好有信心係呃你嘅！
反而三匹先後由韋達贏過嘅「好加加」、「豈等閒」及「天才」，應該可以控制大局。
以近仗勝出姿態而論，英國馬「天才」最具震撼性，先唔好講外國曾大勝九馬位，最近兩戰同程1600米，都喺外檔一湧而過，直路韋達隻手近乎冇乜郁過咁滯，一鞭都冇打，話隻馬係天才的確冇錯，今次升上二班仍覺超卓，將來必定係級際賽馬匹，加上韋達揀佢而棄騎鞋王李子彬愛駒「豈等閒」，更令人添信心。
最強對手其實係長腿女馬主史佩加嘅「好加加」，上仗輕取另一惡馬「天笑」，姿態有目共睹，「好加加」一大優勢係今季只曾四戰，體力充沛，睇嚟搭「天才」單Ｑ，可以順利開出。