著名邵氏女星、葉振棠女友于楓於上月27日因癌病在瑪麗醫院離世，終年63歲。昨日其家人為她在北角香港殯儀館設靈，喪禮採用佛教儀式，但暫未決定其遺體火化後，骨灰將放在香港還是台灣老家。
除了與于楓相守逾20年的葉振棠，及于楓兒子梁作華一家三口外，其他來拜祭的演藝圈好友還有契仔馬浚偉、好友陳潔靈、葉家寶、邵音音及鄭少秋等。靈堂佈置以白色、簡約為主，橫匾寫上「往生淨土」四字。靈堂中間放了三個心形花牌，中間是紅玫瑰，由葉振棠所送，上書：「于楓 往生極樂 」下款是「摯愛 葉振棠」，而放在其左右的都是粉紅色玫瑰花花牌，分別由孫兒及兒媳獻上。至於于楓的前夫梁廷鏘，雖未有來致祭，但亦有送上花牌。
一身黑色素服的棠哥戴上黑色cap帽和墨鏡，於下午4時30分抵達靈堂，他明顯消瘦不少，他脫掉帽子及眼鏡鞠躬，看着女友遺照時，神情哀傷。後來他走到梁作華身邊，摸一摸梁的小兒子頭部後就被安排坐下來。後來記者問及是否願意受訪？他透過唱片公司表示：「人已走，冇乜嘢要講，唔做訪問喇。」
于楓臨終擔心男友
馬浚偉與于楓是由顧嘉煇介紹下認識，相交逾15載。昨日馬浚偉表示：「佢係我契媽，𠵱家走咗，換另一方法睇，係佢唔需要再痛。希望佢喺另一個地方可以冇痛苦。」
至於梁作華，心情尚未平復，受訪時差點哭出來，他說：「媽咪生前係好開心嘅，佢好積極面對個病，好堅持、好強壯咁做化療。媽媽做咗40幾次化療，喺今年2月開始惡化。」問到母親有否交託遺願？他說：「只係擔心我哋、個孫同棠哥（葉振棠）。」談到棠哥如今是否漸平復？梁作華表示：「佢好難過，心情仲未平復到。佢託我同大家講多謝關心，但佢心情非常之差，所以唔做訪問。」
此外，到場弔唁的秋官說：「我同佢識咗……講起上嚟真係好多年，係好多年前英國登台時識。近年因為成日同棠哥登台，見多咗。佢個人好夠義氣，好照顧人。我都知佢病咗好耐吓，但同佢喺電視同電影都冇合作過。」
採訪：譚倩宜
攝影：陳順禎
