「梁粉」羅康瑞本月初正式擔任貿發局主席，旋即風塵僕僕，飛咗去加拿大多倫多與美國芝加哥主持貿發局每年重點推廣活動「Think Asia,Think Hong Kong」。
雖然上任只係兩星期，但佢已經滿肚大計，由希望香港可以加入亞投行、向港交所（388）要求降低創業板上市門檻，講到增加本港展覽場地，認真遠大！
羅康瑞想有作為就肯定㗎喇，之前佢做機管局董事，就積極爭取佢覺得最好嘅機場北商業城設計，𠵱家去到貿發局做主席，就即刻策劃未來大方向。佢建議增加展覽場地十分正路，不過亞投行好似係財爺曾俊華領軍嘅事，羅康瑞又話爭取，會唔會畀咗啲壓力財爺呢？
至於創業板，佢批評創業板𠵱家做得唔好，新股好少，建議降低門檻，之但係，𠵱家蝕錢嘅公司都可以申請，唔知羅主席想點改呢？
好在佢多次重申，呢啲只係佢好初步嘅諗法，大部份要等9月貿發局開理事會時討論，希望佢諗清楚後有較清晰嘅想法喇。