【鳩嗚乜乜乜】
暑假快到，如果計劃兌換亞洲萬里通機位，費清教你執死雞慳里數大法。
航機留畀亞洲萬里通會員兌換嘅機位不多，就算可以喺你指定日子起飛，時間都未必好。費清早前由首爾返港，就只可兌換到清晨8點幾班機，要倒塔咁早去機場。
如果肯付出多啲里數，當然可兌換到時間好嘅機位，如兌換首爾機票本來要3萬里，畀3.6萬里可以換特選經濟客位，或者畀4.5萬里換優越獎勵機票，起飛時間好得多。
臨近出發改時間
不過，其實畀少啲里數一樣換到好時間機位，就係到差唔多出發或回程日子，聯絡萬里通要求改時間，每次更改收手續費約25美金（約195蚊），或者畀1,000里。
以費清為例，由清晨機改到下午3點，就畀咗1,000里；其實費清當初兌換機票時，要搭3點呢班要畀4.5萬里㗎。費清最後成功改到，變相慳1.4萬里，差唔多可以換台灣機票。
業界教路，當你兌換唔到好時間嘅機位，證明班機好full，航空公司好大機會要換大機，賣多啲位出去；但到臨近起飛，剩低機位未必賣得出，就會留番嚟兌換里數，呢個就係執死雞最佳時機。另外，雖然身處外地，但萬里通有免費長途電話，再唔係可以電郵，費清試過電郵半日就有回覆。
費清
＃要生計，也要生活 ＃毋忘初衷