經營崇光百貨（SOGO）嘅利福國際（1212），以往一直由鄭裕彤（彤叔）、劉鑾鴻（細劉）兩個家族共掌，但自從3年前開始，彤叔阿仔鄭家純（純官）正式做鄭氏家族話事人後，市場已經盛傳，鄭家遲早會賣甩利福。
果然，細劉、純官喺舊年聖誕前夕宣佈「終極分手」，鄭氏家族旗下周大福企業幾乎賣清所有利福股份，只為免債券條款違約而象徵式保留一股。噚日利福進一步宣佈，原本係首席執行官嘅細劉，正式坐正，兼任利福主席一職，接替早前股東會上已經冇續任嘅彤叔。
其實利福營運向來都由細劉親自打理，鄭家人絕少參與，所以細劉今次坐正屬合情合理，亦符合市場預期。純官早前喺股東會上，同樣選擇不再重選做利福非執董，以後可以開少幾個會。至於鄭家目前喺利福董事會中，只剩下一名代表、即彤叔女婿杜惠愷，噚日亦調任非執董。