人稱「Sam哥」的吳鎮宇出道逾30年，自言作為後輩，獲邀為即將慶祝20年報慶的《蘋果日報》，特別來挑戰《我Q你答問會》。鎮宇發揮當年《鬚根Show》的棟篤笑功架，將來自中環及銅鑼灣的13名讀者的問題以抵死的方式回應，幽默而不失真實。他還透露在演技方面跟劉青雲及黃秋生都在伯仲之間，但論長氣秋生就必定勝人一籌。
採訪：何永寧、魏嘉琳
1.鍾小姐：你覺得你幾時會攞金像獎影帝呀？
鎮宇：喺我心裏面我攞咗好耐嘞，姐姐。唔好理啲形式嘢啦，好冇。畀個位我行返落嚟啦，你抬到我咁高。有時拍戲唔係為呢樣嘢，呢樣係bonus冇問題，緣份到就可以攞。
2.郭小朋友：Sam哥哥呀，如果再畀你拍《爸爸去哪兒》，你有冇興趣繼續拍落去呀？
鎮宇：可以㗎，但係BB要返學呀，如果上一次唔參加就冇機會，因為佢讀小學一年級，好麻煩好多功課，下一年係二年級更多功課，睇緣份啦，多謝你支持。
3.薛小姐：如果內地開《媽媽去哪兒》，你會不會畀你老婆參加？
鎮宇：如果內地有《媽媽去哪兒》要由媽媽去決定，我好怕去替人決定一啲嘢，就係咁簡單。
4.Barry：你覺得自己、黃秋生同劉青雲邊個好戲啲？
鎮宇：其實我喺佢哋面前，我係偶像派嚟㗎。佢哋先係實力派，好唔好戲真係見仁見智，但長氣一定係黃秋生。
5.Olivia：如果畀你揀多次你會做飛機師定演員？
鎮宇：揀多次？揀做飛機師呢就淨係做飛機師啦，如果揀做演員可以做飛機師、又可以做殭屍又可以做喪屍，又可以做廚師，我諗做演員着數啲噃。
6.Abbie：我想聽Sam哥唱《歲月如歌》，可以唱兩句來聽聽嗎？
鎮宇：我可唔可以下一個問題。頭嗰幾句點唱《歲月如歌》？我問頭嗰幾句佢唱中間，咁唔關我事，「天氣不似如期……（下刪數十字）」
7.Melanie：你有冇幫你老婆做家務？
鎮宇：我唔係幫呀，幫，係佢做嘅嘢我幫佢完成，但家務係工人做嘅。其實我有煮飯，煮飯係比較拿手啲。其他嘅嘢如果新工人嚟，我哋會示範畀佢哋睇點樣處理成間屋嘅嘢。其實兩個（兩公婆）都有做啲嘢，家務share做。
8.Shermaine：Hello，你點解要改藝名，唔用番吳志強呢？
鎮宇：咁做藝人要有一個特別啲嘅藝名，阿妹係咪？同埋嗰陣時都興藝名咪改一個囉。我唔係唔鍾意我個名，個名係阿媽改，好有紀念價值。因為一個唔識字女人生第一胎個醫生問『師奶，個仔叫咩名呀？』就噏『志強』兩個字其實都幾感動，亦都覺得阿媽對我期望。撈呢行阿媽期望冇用㗎嘛，要導演同觀眾對我期望，所以就用咗『鎮宇』呢兩個字，到𠵱家都OK。
9.區先生：Sam哥你好，當年《鬚根Show》咁爆，有冇諗住再開呀？
鎮宇：嘩！呢個真係捧場客，《鬚根Show》你都睇過，咁出嚟搵食梗係要講口齒，講咗最後一次《鬚根Show》。但係我哋計劃過仲有個題材，係舞台用彈弓、威吔做棟篤笑叫《論盡金庸》，希望我哋三個可以再次喺舞台同大家見面。
10.Crystal：鎮宇你覺得圈中邊個chok過你呀？
鎮宇：圈中邊個chok過我？大把人啦，出名chok嗰啲一定chok過我啦，乜我好chok咩？唔係啩？少少啫，OK。
11.View：你有冇睇過沈震軒扮嘅「𡃁坤」？你覺得佢做成點呀，可唔可以用「𡃁坤」聲答呀？
鎮宇：（𡃁坤聲）唉，我冇理江湖事咁耐嘞，嗰啲細嘅，佢哋話點就點啦，算嘞，唔好重蹈覆轍嘞，撈番正行啦，軒仔。
